Whilst Ukraine and her heroic people and armed forces continue to give the Russian bear a bloody nose, cease not to pray for the victory and deliverance of Ukraine – and to this end, I have drawn up the following Votive Matins in Time of War:
Ad Matutinum Votivum in Tempore Belli
(Totum secreto) Pater noster, qui es in cælis, sanctificétur nomen tuum: advéniat regnum tuum: fiat volúntas tua, sicut in cælo et in terra. Panem nostrum quotidiánum da nobis hódie: et dimítte nobis débita nostra, sicut et nos dimíttimus debitóribus nostris: et ne nos indúcas in tentatiónem: sed líbera nos a malo. Amen. (Matt. 6, 9-13; Luc. 11, 3)
(Totum secreto) Ave María, grátia plena; Dóminus tecum: benedícta tu in muliéribus, et benedíctus fructus ventris tui Jesus. (Cf. Luc. 1, 28. 42) Sancta María, Mater Dei, ora pro nobis peccatóribus, nunc et in hora mortis nostræ. Amen.
(Totum secreto) Credo in Deum, Patrem omnipoténtem, Creatórem cæli et terræ. Et in Jesum Christum, Fílium ejus únicum, Dóminum nostrum: qui concéptus est de Spíritu Sancto, natus ex María Vírgine, passus sub Póntio Piláto, crucifíxus, mórtuus, et sepúltus: descéndit ad ínferos; tértia die resurréxit a mórtuis; ascéndit ad cælos; sedet ad déxteram Dei Patris omnipoténtis: inde ventúrus est judicáre vivos et mórtuos. Credo in Spíritum Sanctum, sanctam Ecclésiam cathólicam, Sanctórum communiónem, remissiónem peccatórum, carnis resurrectiónem, vitam ætérnam. Amen.
V. Dómine, lábia mea apéries.
R. Et os meum annuntiábit laudem tuam. (Ps. 50, 17)
V. Deus, in adjutórium meum inténde.
R. Dómine, ad adjuvándum me festína. (Ps. 69, 2)
Glória Patri, et Fílio, et Spirítui Sancto.
Sicut erat in princípio, et nunc, et semper, et in sǽcula sæculórum. Amen.
Allelúja. (T. Sept. Laus tibi, Domine, Rex æternæ gloriæ.)
Invitatorium.
Aña. Dominum potentem in prælio, * Venite, adoremus. T. P. Alleluja. (Cf. Pss. 23, 8; 94, 6)
Aña. Dominum potentem in prælio, * Venite, adoremus. T. P. Alleluja.
Psalmus 94.
Veníte, exsultémus Dómino, jubilémus Deo, salutári nostro: præoccupémus fáciem ejus in confessióne, et in psalmis jubilémus ei.
Aña. Dominum potentem in prælio, * Venite, adoremus. T. P. Alleluja.
V. Quóniam Deus magnus Dóminus, et Rex magnus super omnes deos, quóniam non repéllet Dóminus plebem suam: quia in manu ejus sunt omnes fines terræ, et altitúdines móntium ipse cónspicit.
* Venite, adoremus. T. P. Alleluja.
V. Quóniam ipsíus est mare, et ipse fecit illud, et áridam fundavérunt manus ejus: veníte, adorémus, et procidámus ante Deum: plorémus coram Dómino, qui fecit nos, quia ipse est Dóminus, Deus noster; nos autem pópulus ejus, et oves páscuæ ejus.
Aña. Dominum potentem in prælio, * Venite, adoremus. T. P. Alleluja.
V. Hódie, si vocem ejus audiéritis, nolíte obduráre corda vestra, sicut in exacerbatióne secúndum diem tentatiónis in desérto: ubi tentavérunt me patres vestri, probavérunt et vidérunt ópera mea.
* Venite, adoremus. T. P. Alleluja.
V. Quadragínta annis próximus fui generatióni huic, et dixi; Semper hi errant corde, ipsi vero non cognovérunt vias meas: quibus jurávi in ira mea; Si introíbunt in réquiem meam.
Aña. Dominum potentem in prælio, * Venite, adoremus. T. P. Alleluja.
V. Glória Patri, et Fílio, et Spirítui Sancto. Sicut erat in princípio, et nunc, et semper, et in sǽcula sæculórum. Amen.
* Venite, adoremus. T. P. Alleluja.
Aña. Dominum potentem in prælio, * Venite, adoremus. T. P. Alleluja.
Hymn.
O salutaris Hostia,
Quæ cæli pandis ostium,
Bella premunt hostilia;
Da robur, fer auxilium.
Uni trinoque Domino
Sit sempiterna gloria:
Qui vitam sine termino,
Nobis donet in patria. Amen.
(Dominica, Feria II et Feria V.)
In I Nocturno. [13 + 10 + 11 = 34 vv.]
Aña. 1. Dissipa gentes quæ bella volunt. (Ps. 67, 31)
T. P. Aña. Alleluja, alleluja, alleluja.
Psalmus 2. [13 vv.]
Quare fremuérunt gentes: * et pópuli meditáti sunt inánia?
Astitérunt reges terræ, et príncipes convenérunt in unum * advérsus Dóminum, et advérsus Christum ejus.
Dirumpámus víncula eórum: * et projiciámus a nobis jugum ipsórum.
Qui hábitat in cælis, irridébit eos: * et Dóminus subsannábit eos.
Tunc loquétur ad eos in ira sua, * et in furóre suo conturbábit eos.
Ego autem constitútus sum Rex ab eo super Sion montem sanctum ejus, * prǽdicans præcéptum ejus.
Dóminus dixit ad me: * Fílius meus es tu, ego hódie génui te.
Póstula a me, et dabo tibi gentes hereditátem tuam, * et possessiónem tuam términos terræ.
Reges eos in virga férrea, * et tamquam vas fíguli confrínges eos.
Et nunc, reges, intellégite: * erudímini, qui judicátis terram.
Servíte Dómino in timóre: * et exsultáte ei cum tremóre.
Apprehéndite disciplínam, nequándo irascátur Dóminus, * et pereátis de via justa.
Cum exárserit in brevi ira ejus: * beáti omnes qui confídunt in eo.
Glória Patri, et Fílio, * et Spirítui Sancto.
Sicut erat in princípio, et nunc, et semper, * et in sǽcula sæculórum. Amen.
Aña. Dissipa gentes quæ bella volunt.
Aña. 2. Exáudiat te Dóminus in die tribulatiónis. † (Ps. 19, 2)
Psalmus 19. [10 vv.]
Exáudiat te Dóminus in die tribulatiónis: † * prótegat te nomen Dei Jacob.
Mittat tibi auxílium de sancto: * et de Sion tueátur te.
Memor sit omnis sacrifícii tui: * et holocáustum tuum pingue fiat.
Tríbuat tibi secúndum cor tuum: * et omne consílium tuum confírmet.
Lætábimur in salutári tuo: * et in nómine Dei nostri magnificábimur.
Ímpleat Dóminus omnes petitiónes tuas: * nunc cognóvi quóniam salvum fecit Dóminus Christum suum.
Exáudiet illum de cælo sancto suo: * in potentátibus salus déxteræ ejus.
Hi in cúrribus, et hi in equis: * nos autem in nómine Dómini Dei nostri invocábimus.
Ipsi obligáti sunt, et cecidérunt: * nos autem surréximus et erécti sumus.
Dómine, salvum fac regem: * et exáudi nos in die, qua invocavérimus te.
Glória Patri, et Fílio, * et Spirítui Sancto.
Sicut erat in princípio, et nunc, et semper, * et in sǽcula sæculórum. Amen.
Aña. Exáudiat te Dóminus in die tribulatiónis.
Aña. 3. Adjuvábit eam Deus vultu suo: Deus in médio ejus, non commovébitur. (Cf. Ps. 45, 6)
Psalmus 45. [11 vv.]
Deus noster refúgium, et virtus: * adjútor in tribulatiónibus, quæ invenérunt nos nimis.
Proptérea non timébimus dum turbábitur terra: * et transferéntur montes in cor maris.
Sonuérunt, et turbátæ sunt aquæ eórum: * conturbáti sunt montes in fortitúdine ejus.
Flúminis ímpetus lætíficat civitátem Dei: * sanctificávit tabernáculum suum Altíssimus.
Deus in médio ejus, non commovébitur: * adjuvábit eam Deus mane dilúculo.
Conturbátæ sunt gentes, et inclináta sunt regna: * dedit vocem suam, mota est terra.
Dóminus virtútum nobíscum: * suscéptor noster Deus Jacob.
Veníte, et vidéte ópera Dómini, quæ pósuit prodígia super terram: * áuferens bella usque ad finem terræ.
Arcum cónteret, et confrínget arma: * et scuta combúret igni.
Vacáte, et vidéte quóniam ego sum Deus: * exaltábor in géntibus, et exaltábor in terra.
Dóminus virtútum nobíscum: * suscéptor noster Deus Jacob.
Glória Patri, et Fílio, * et Spirítui Sancto.
Sicut erat in princípio, et nunc, et semper, * et in sǽcula sæculórum. Amen.
Aña. Adjuvábit eam Deus vultu suo: Deus in médio ejus, non commovébitur.
T. P. Aña. Alleluja, alleluja, alleluja.
V. Si consistant adversum me castra, non timebit cor meum. T. P. Alleluja.
R. Si exsurgat adversum me prælium, in hoc ego sperabo. T. P. Alleluja. (Ps. 26, 3)
Pater noster (secreto) qui es in cælis, sanctificétur nomen tuum: advéniat regnum tuum: fiat volúntas tua, sicut in cælo et in terra. Panem nostrum quotidiánum da nobis hódie: et dimítte nobis débita nostra, sicut et nos dimíttimus debitóribus nostris.
V. Et ne nos indúcas in tentatiónem.
R. Sed líbera nos a malo. (Matt. 6, 9-13; Luc. 11, 3)
V. Jube, Domine, benedicere.
Bened. 1. Dominus bella adversariorum nostrorum atterat, et acies eorum igne cælesti consumat. R. Amen. (Brev. Goth., In Primo Dominico post Octavam Epiphaniæ Domini, Ad Vesperos, Bened., alt.)
Lectio 1. (Exod. 17, 8-13)
De libro Exodi.
Venit autem Amalec, et pugnabat contra Israël in Raphidim. Dixitque Moyses ad Josue: Elige viros: et egressus, pugna contra Amalec: cras ego stabo in vertice collis, habens virgam Dei in manu mea. Fecit Josue ut locutus erat Moyses, et pugnavit contra Amalec: Moyses autem et Aaron et Hur ascenderunt super verticem collis. Cumque levaret Moyses manus, vincebat Israël: sin autem paululum remisisset, superabat Amalec. Manus autem Moysi erant graves: sumentes igitur lapidem, posuerunt subter eum, in quo sedit: Aaron autem et Hur sustentabant manus ejus ex utraque parte. Et factum est ut manus illius non lassarentur usque ad occasum solis. Fugavitque Josue Amalec, et populum ejus in ore gladii. — Tu autem, Domine, miserere nobis. R. Deo gratias.
Responsorium 1. (Exod. 15, 1. 2. 3)
R. Cantémus Dómino: glorióse enim honorificátus est, equum et ascensórem projécit in mare: * Adjútor et protéctor factus est mihi Dóminus in salútem. T. P. Alleluja.
V. Dóminus quasi vir pugnátor, Omnípotens nomen ejus. * Adjútor et protéctor factus est mihi Dóminus in salútem. T. P. Alleluja.
V. Jube, Domine, benedicere.
Bened. 2. Dóminus ab omni bellórum nequítia nos éruat, et in suæ protectiónis securitáte constítuat. R. Amen. (Secreta, Missa in Tempore Belli, alt.)
Lectio 2. (Deut. 20, 1-4)
De libro Deuteronomii.
Si exieris ad bellum contra hostes tuos, et videris equitatus et currus, et majorem quam tu habeas adversarii exercitus multitudinem, non timebis eos: quia Dominus Deus tuus tecum est, qui eduxit te de terra Ægypti. Appropinquante autem jam prælio, stabit sacerdos ante aciem, et sic loquetur ad populum: Audi, Israël: vos hodie contra inimicos vestros pugnam committitis: non pertimescat cor vestrum, nolite metuere, nolite cedere, nec formidetis eos: quia Dominus Deus vester in medio vestri est, et pro vobis contra adversarios dimicabit, ut eruat vos de periculo. — Tu autem, Domine, miserere nobis. R. Deo gratias.
Responsorium 2. (Exod. 23, 20. 21. 22; Ps. 80, 9-11)
R. Ecce mitto Angelum meum, qui præcédat te, et custódiat semper: * Obsérva et audi vocem meam, et inimícus ero inimícis tuis, et affligéntes te afflígam: et præcédet te Angelus meus. T. P. Alleluja.
V. Israël, si me audíeris, non erit in te deus recens, neque adorábis deum aliénum: ego enim Dóminus. * Obsérva et audi vocem meam, et inimícus ero inimícis tuis, et affligéntes te afflígam: et præcédet te Angelus meus. T. P. Alleluja.
V. Jube, Domine, benedicere.
Bened. 3. Dominus omnipotens conterat bella, et donet pacem in universa terra. R. Amen. (Miss. Amb., Offertorium, Missa pro pace, alt.)
Lectio 3. (1 Reg. 17, 45-47)
De libro primo Regum.
Dixit autem David ad Philisthæum: Tu venis ad me cum gladio, et hasta, et clypeo: ego autem venio ad te in nomine Domini exercituum, Dei agminum Israël, quibus exprobrasti hodie, et dabit te Dominus in manu mea, et percutiam te, et auferam caput tuum a te: et dabo cadavera castrorum Philisthiim hodie volatilibus cæli, et bestiis terræ: ut sciat omnis terra quia est Deus in Israël: et noverit universa ecclesia hæc, quia non in gladio, nec in hasta salvat Dominus: ipsius enim est bellum, et tradet vos in manus nostras. — Tu autem, Domine, miserere nobis. R. Deo gratias.
Responsorium 3. (1 Reg. 18, 7; 29, 5; 17, 26; Luc. 1, 66)
R. Percússit Saul mille, et David decem míllia: * Quia manus Dómini erat cum illo: percússit Philisthǽum, et ábstulit oppróbrium ex Israël. T. P. Alleluja.
V. Nonne iste est David, de quo canébant in choro, dicéntes: Saul percússit mille, et David decem míllia? * Quia manus Dómini erat cum illo: percússit Philisthǽum, et ábstulit oppróbrium ex Israël. T. P. Alleluja.
V. Glória Patri, et Fílio, et Spirítui Sancto. * Quia manus Dómini erat cum illo: percússit Philisthǽum, et ábstulit oppróbrium ex Israël. T. P. Alleluja.
(Feria III et Feria VI.)
In II Nocturno. [13 + 12 + 14 = 39 vv.]
Aña. 4. Da nobis, Dómine, auxílium de tribulatióne. (Cf. Ps. 59, 13)
T. P. Aña. Alleluja, alleluja, alleluja.
Psalmus 59. [13 vv.]
Deus, repulísti nos, et destruxísti nos: * irátus es, et misértus es nobis.
Commovísti terram, et conturbásti eam: * sana contritiónes ejus, quia commóta est.
Ostendísti pópulo tuo dura: * potásti nos vino compunctiónis.
Dedísti metuéntibus te significatiónem: * ut fúgiant a fácie arcus:
Ut liberéntur dilécti tui: * salvum fac déxtera tua, et exáudi me.
Deus locútus est in sancto suo: * lætábor, et partíbor Síchimam: et convállem tabernaculórum metíbor.
Meus est Gálaad, et meus est Manásses: * et Éphraim fortitúdo cápitis mei.
Juda rex meus: * Moab olla spei meæ.
In Idumǽam exténdam calceaméntum meum: * mihi alienígenæ súbditi sunt.
Quis dedúcet me in civitátem munítam? * quis dedúcet me usque in Idumǽam?
Nonne tu, Deus, qui repulísti nos? * et non egrediéris, Deus, in virtútibus nostris?
Da nobis auxílium de tribulatióne: * quia vana salus hóminis.
In Deo faciémus virtútem: * et ipse ad níhilum dedúcet tribulántes nos.
Glória Patri, et Fílio, * et Spirítui Sancto.
Sicut erat in princípio, et nunc, et semper, * et in sǽcula sæculórum. Amen.
Aña. Da nobis, Dómine, auxílium de tribulatióne.
Aña. 5. Per signum Crucis de inimícis nostris líbera nos, Deus noster. (Aña. 5. ad Laudes S. Crucis)
Psalmus 75. [12 vv.]
Notus in Judǽa Deus: * in Israël magnum nomen ejus.
Et factus est in pace locus ejus: * et habitátio ejus in Sion.
Ibi confrégit poténtias árcuum, * scutum, gládium, et bellum.
Illúminans tu mirabíliter a móntibus ætérnis: * turbáti sunt omnes insipiéntes corde.
Dormiérunt somnum suum: * et nihil invenérunt omnes viri divitiárum in mánibus suis.
Ab increpatióne tua, Deus Jacob, * dormitavérunt qui ascendérunt equos.
Tu terríbilis es, et quis resístet tibi? * ex tunc ira tua.
De cælo audítum fecísti judícium: * terra trémuit et quiévit,
Cum exsúrgeret in judícium Deus, * ut salvos fáceret omnes mansuétos terræ.
Quóniam cogitátio hóminis confitébitur tibi: * et relíquiæ cogitatiónis diem festum agent tibi.
Vovéte, et réddite Dómino, Deo vestro: * omnes, qui in circúitu ejus affértis múnera.
Terríbili et ei qui aufert spíritum príncipum, * terríbili apud reges terræ.
Glória Patri, et Fílio, * et Spirítui Sancto.
Sicut erat in princípio, et nunc, et semper, * et in sǽcula sæculórum. Amen.
Aña. Per signum Crucis de inimícis nostris líbera nos, Deus noster.
Aña. 6. Da pacem, Domine, in diebus nostris, quia non est alius qui pugnet pro nobis, nisi tu, Deus noster.
Psalmus 107. [14 vv.]
Parátum cor meum, Deus, parátum cor meum: * cantábo, et psallam in glória mea.
Exsúrge, glória mea, exsúrge, psaltérium et cíthara: * exsúrgam dilúculo.
Confitébor tibi in pópulis, Dómine: * et psallam tibi in natiónibus.
Quia magna est super cælos misericórdia tua: * et usque ad nubes véritas tua:
Exaltáre super cælos, Deus, et super omnem terram glória tua: * ut liberéntur dilécti tui.
Salvum fac déxtera tua, et exáudi me: * Deus locútus est in sancto suo:
Exsultábo, et dívidam Síchimam, * et convállem tabernaculórum dimétiar.
Meus est Gálaad, et meus est Manásses: * et Éphraim suscéptio cápitis mei.
Juda rex meus: * Moab lebes spei meæ.
In Idumǽam exténdam calceaméntum meum: * mihi alienígenæ amíci facti sunt.
Quis dedúcet me in civitátem munítam? * quis dedúcet me usque in Idumǽam?
Nonne tu, Deus, qui repulísti nos, * et non exíbis, Deus, in virtútibus nostris?
Da nobis auxílium de tribulatióne: * quia vana salus hóminis.
In Deo faciémus virtútem: * et ipse ad níhilum dedúcet inimícos nostros.
Glória Patri, et Fílio, * et Spirítui Sancto.
Sicut erat in princípio, et nunc, et semper, * et in sǽcula sæculórum. Amen.
Aña. Da pacem, Domine, in diebus nostris, quia non est alius qui pugnet pro nobis, nisi tu, Deus noster.
T. P. Aña. Alleluja, alleluja, alleluja.
V. Benedictus Dominus Deus meus, qui docet manus meas ad prælium. T. P. Alleluja.
R. Et digitos meos ad bellum. T. P. Alleluja. (Ps. 143, 1)
Pater noster (secreto) qui es in cælis, sanctificétur nomen tuum: advéniat regnum tuum: fiat volúntas tua, sicut in cælo et in terra. Panem nostrum quotidiánum da nobis hódie: et dimítte nobis débita nostra, sicut et nos dimíttimus debitóribus nostris.
V. Et ne nos indúcas in tentatiónem.
R. Sed líbera nos a malo. (Matt. 6, 9-13; Luc. 11, 3)
V. Jube, Domine, benedicere.
Bened. 4. Dominus, per vexillum sanctæ Crucis, conterat insidias adversæ potestatis. R. Amen. (Secreta in Invent. S. Crucis, alt.)
Lectio 4. (2 Par. 14, 10. 11.)
De libro secundo Paralipomenon.
Asa instruxit aciem ad bellum: et invocavit Dominum Deum, et ait: Domine, non est apud te ulla distantia, utrum in paucis auxilieris, an in pluribus. Adjuva nos, Domine Deus noster: in te enim, et in tuo nomine habentes fiduciam venimus contra hanc multitudinem. Domine, Deus noster tu es: non prævaleat contra te homo. — Tu autem, Domine, miserere nobis. R. Deo gratias.
Responsorium 4. (Ps. 26, 3; Ps. 70, 6. 5. 7)
R. Si consistant adversum me castra, non timebit cor meum: * Si exsurgat adversum me prælium, in hoc ego sperabo. T. P. Alleluja.
V. In te cantatio mea semper, quoniam tu adjutor fortis. * Si exsurgat adversum me prælium, in hoc ego sperabo. T. P. Alleluja.
V. Jube, Domine, benedicere.
Bened. 5. Prótegat Dóminus plebem ejus, per signum sanctæ Crucis, ab inimicórum ómnium ómnibus insídiis. R. Amen. (Offertorium in Exalt. Sanctæ Crucis, alt.)
Lectio 5. (Judith 9, 1. 6-11)
De libro Judith.
Judith clamabat ad Dominum, dicens: Respice castra Assyriorum nunc, sicut tunc castra Ægyptiorum videre dignatus es, quando post servos tuos armati currebant, confidentes in quadrigis, et in equitatu suo, et in multitudine bellatorum. Sed aspexisti super castra eorum, et tenebræ fatigaverunt eos. Tenuit pedes eorum abyssus, et aquæ operuerunt eos. Sic fiant et isti, Domine, qui confidunt in multitudine sua, et in curribus suis, et in contis, et in scutis, et in sagittis suis, et in lanceis gloriantur, et nesciunt quia tu ipse es Deus noster, qui conteris bella ab initio, et Dominus nomen est tibi. Erige brachium tuum sicut ab initio, et allide virtutem illorum in virtute tua: cadat virtus eorum in iracundia tua, qui promittunt se violare sancta tua, et polluere tabernaculum nominis tui, et dejicere gladio suo cornu altaris tui. — Tu autem, Domine, miserere nobis. R. Deo gratias.
Responsorium 5. (Cf. Judith 9, 10. 11)
R. Dómine Deus, qui cónteris bella ab inítio, éleva brácchium tuum super gentes, quæ cógitant servis tuis mala: * Et déxtera tua glorificétur in nobis. T. P. Alleluja.
V. Allíde virtútem eórum in virtúte tua; cadat robur eórum in iracúndia tua. * Et déxtera tua glorificétur in nobis. T. P. Alleluja.
V. Jube, Domine, benedicere.
Bened. 6. Qui pependit in ligno, liberet nos ab hoste maligno. R. Amen. (Brev. Amb., Hebd. I & II, Feria VI, Bened. III)
Lectio 6. (2 Mach. 15, 21-24)
De libro secundo Machabæórum.
Considerans Machabæus adventum multitudinis, et apparatum variam armorum, et ferocitatem bestiarum, extendens manus in cælum, prodigia facientem Dominum invocavit, qui non secundum armorum potentiam, sed prout ipsi placet, dat dignis victoriam. Dixit autem invocans hoc modo: Tu Domine, qui misisti angelum tuum sub Ezechia rege Juda, et interfecisti de castris Sennacherib centum octoginta quinque millia: et nunc, dominator cælorum, mitte angelum tuum bonum ante nos in timore et tremore magnitudinis brachii tui, ut metuant qui cum blasphemia veniunt adversus sanctum populum tuum. Et hic quidem ita peroravit. — Tu autem, Domine, miserere nobis. R. Deo gratias.
Responsorium 6. (V. Cf. 2 Mach. 1, 28)
R. Aperi óculos tuos, Dómine, et vide afflictiónem nostram: circumdedérunt nos gentes ad puniéndum nos: * Sed tu, Dómine, exténde brácchium tuum, et líbera ánimas nostras. T. P. Alleluja.
V. Afflíge oppriméntes nos et contuméliam faciéntes in supérbiam; et custódi partem tuam. * Sed tu, Dómine, exténde brácchium tuum, et líbera ánimas nostras. T. P. Alleluja.
V. Glória Patri, et Fílio, et Spirítui Sancto. * Sed tu, Dómine, exténde brácchium tuum, et líbera ánimas nostras. T. P. Alleluja.
(Feria IV et Sabbato.)
In III Nocturno. [22 + 7 + 16 = 45 vv.]
Aña. 7. Ecce Crucem Dómini, fúgite, partes advérsæ, vicit leo de tribu Juda, radix David, (T. Sept. om.) allelúja. (Aña. 3. ad Laudes S. Crucis)
Canticum Moysi. (Exod. 15, 1-19) [22 vv.]
Cantémus Dómino: glorióse enim magnificátus est, * equum et ascensórem dejécit in mare.
Fortitúdo mea, et laus mea Dóminus, * et factus est mihi in salútem.
Iste Deus meus, et glorificábo eum: * Deus patris mei, et exaltábo eum.
Dóminus quasi vir pugnátor, Omnípotens nomen ejus. * Currus Pharaónis et exércitum ejus projécit in mare.
Elécti príncipes ejus submérsi sunt in Mari Rubro: * abýssi operuérunt eos, descendérunt in profúndum quasi lapis.
Déxtera tua, Dómine, magnificáta est in fortitúdine: déxtera tua, Dómine, percússit inimícum. * Et in multitúdine glóriæ tuæ deposuísti adversários tuos:
Misísti iram tuam, quæ devorávit eos sicut stípulam. * Et in spíritu furóris tui congregátæ sunt aquæ:
Stetit unda fluens, * congregátæ sunt abýssi in médio mari.
Dixit inimícus: Pérsequar et comprehéndam, * dívidam spólia, implébitur ánima mea:
Evaginábo gládium meum, * interfíciet eos manus mea.
Flavit spíritus tuus, et opéruit eos mare: * submérsi sunt quasi plumbum in aquis veheméntibus.
Quis símilis tui in fórtibus, Dómine? * quis símilis tui, magníficus in sanctitáte, terríbilis atque laudábilis, fáciens mirabília?
Extendísti manum tuam, et devorávit eos terra. * Dux fuísti in misericórdia tua pópulo quem redemísti:
Et portásti eum in fortitúdine tua, * ad habitáculum sanctum tuum.
Ascendérunt pópuli, et iráti sunt: * dolóres obtinuérunt habitatóres Philísthiim.
Tunc conturbáti sunt príncipes Edom, robústos Moab obtínuit tremor: * obriguérunt omnes habitatóres Chánaan.
Írruat super eos formído et pavor, * in magnitúdine brácchii tui:
Fiant immóbiles quasi lapis, donec pertránseat pópulus tuus, Dómine, * donec pertránseat pópulus tuus iste, quem possedísti.
Introdúces eos, et plantábis in monte hereditátis tuæ, * firmíssimo habitáculo tuo quod operátus es, Dómine:
Sanctuárium tuum, Dómine, quod firmavérunt manus tuæ. * Dóminus regnábit in ætérnum et ultra.
Ingréssus est enim eques Phárao cum cúrribus et equítibus ejus in mare: * et redúxit super eos Dóminus aquas maris:
Fílii autem Israël ambulavérunt per siccum * in médio ejus.
Glória Patri, et Fílio, * et Spirítui Sancto.
Sicut erat in princípio, et nunc, et semper, * et in sǽcula sæculórum. Amen.
Canticum David. (1 Par. 29, 10-13) [7 vv.]
Benedíctus es, Dómine, Deus Israël patris nostri, * ab ætérno in ætérnum.
Tua est, Dómine, magnificéntia, et poténtia, * et glória, atque victória:
Et tibi laus: * cuncta enim quæ in cælo sunt, et in terra, tua sunt:
Tuum, Dómine, regnum, * et tu es super omnes príncipes.
Tuæ divítiæ, et tua est glória: * tu domináris ómnium,
In manu tua virtus et poténtia: * in manu tua magnitúdo, et impérium ómnium.
Nunc ígitur, Deus noster, confitémur tibi, * et laudámus nomen tuum ínclitum.
Glória Patri, et Fílio, * et Spirítui Sancto.
Sicut erat in princípio, et nunc, et semper, * et in sǽcula sæculórum. Amen.
Canticum Ecclesiastici. (Eccli. 36, 1-16) [16 vv.]
Miserére nostri, Deus ómnium, et réspice nos, * et osténde nobis lucem miseratiónum tuárum:
Et immítte timórem tuum super gentes, * quæ non exquisiérunt te,
Ut cognóscant quia non est Deus nisi tu, * et enárrent magnália tua.
Álleva manum tuam super gentes aliénas, * ut vídeant poténtiam tuam.
Sicut enim in conspéctu eórum sanctificátus es in nobis, * sic in conspéctu nostro magnificáberis in eis,
Ut cognóscant te, sicut et nos cognóvimus, * quóniam non est Deus præter te, Dómine.
Ínnova signa, et immúta mirabília. * Glorífica manum, et brácchium dextrum.
Éxcita furórem, et effúnde iram. * Tolle adversárium, et afflíge inimícum.
Festína tempus, et meménto finis, * ut enárrent mirabília tua.
In ira flammæ devorétur qui salvátur: * et qui péssimant plebem tuam, invéniant perditiónem.
Cóntere caput príncipum inimicórum, * dicéntium: Non est álius præter nos.
Cóngrega omnes tribus Jacob: ut cognóscant quia non est Deus nisi tu, * et enárrent magnália tua:
Et hereditábis eos, * sicut ab inítio.
Miserére plebi tuæ, super quam invocátum est nomen tuum: * et Israël, quem coæquásti primogénito tuo.
Miserére civitáti sanctificatiónis tuæ Jerúsalem, * civitáti requiéi tuæ.
Reple Sion inenarrabílibus verbis tuis, * et glória tua pópulum tuum.
Glória Patri, et Fílio, * et Spirítui Sancto.
Sicut erat in princípio, et nunc, et semper, * et in sǽcula sæculórum. Amen.
Aña. Ecce Crucem Dómini, fúgite, partes advérsæ, vicit leo de tribu Juda, radix David, (T. Sept. om.) allelúja.
V. Dominus conterens bella. T. P. Alleluja.
R. Dominus nomen est illi. T. P. Alleluja. (Judith 16, 3)
Pater noster (secreto) qui es in cælis, sanctificétur nomen tuum: advéniat regnum tuum: fiat volúntas tua, sicut in cælo et in terra. Panem nostrum quotidiánum da nobis hódie: et dimítte nobis débita nostra, sicut et nos dimíttimus debitóribus nostris.
V. Et ne nos indúcas in tentatiónem.
R. Sed líbera nos a malo. (Matt. 6, 9-13; Luc. 11, 3)
V. Jube, Domine, benedicere.
Bened. 7. Dóminus nos éruat a delíctis: et ab inimicórum deféndat insídiis. R. Amen. (Postcommunio pro inimicis, alt.)
Lectio 7. (1 Mach. 3, 18-22)
De libro primo Machabæórum.
Ait Judas: Facile est concludi multos in manus paucorum: et non est differentia in conspectu Dei cæli liberare in multis, et in paucis: quoniam non in multitudine exercitus victoria belli, sed de cælo fortitudo est. Ipsi veniunt ad nos in multitudine contumaci, et superbia, ut disperdant nos, et uxores nostras, et filios nostros, et ut spolient nos: nos vero pugnabimus pro animabus nostris, et legibus nostris: et ipse Dominus conteret eos ante faciem nostram: vos autem ne timueritis eos. — Tu autem, Domine, miserere nobis. R. Deo gratias.
Responsorium 7. (V. Ps. 58, 12)
R. Congregáti sunt inimíci nostri, et gloriántur in virtúte sua: cóntere fortitúdinem illórum, Dómine, et dispérge illos: * Ut cognóscant quia non est álius qui pugnet pro nobis, nisi tu, Deus noster. T. P. Alleluja.
V. Dispérge illos in virtúte tua, et déstrue eos, protéctor noster, Dómine. * Ut cognóscant quia non est álius qui pugnet pro nobis, nisi tu, Deus noster. T. P. Alleluja.
V. Jube, Domine, benedicere.
Bened. 8. Per Vírginem Matrem concédat nobis Dóminus victóriam et pacem. R. Amen. (Mat. B.M.V., Bened., alt.)
Lectio 8. (1 Mach. 3, 58-60)
Ait Judas: Accingimini, et estote filii potentes, et estote parati in mane, ut pugnetis adversus nationes has quæ convenerunt adversus nos disperdere nos, et sancta nostra: quoniam melius est nos mori in bello, quam videre mala gentis nostræ, et sanctorum. Sicut autem fuerit voluntas in cælo, sic fiat. — Tu autem, Domine, miserere nobis. R. Deo gratias.
Responsorium 8. (Cf. 2 Par. 20, 12; V. 1 Mach. 3, 52. 53)
R. Congregátæ sunt gentes in multitúdine, ut dímicent contra nos, et ignorámus quid ágere debeámus: * Dómine Deus, ad te sunt óculi nostri, ne pereámus. T. P. Alleluja.
V. Tu scis quæ cógitant in nos: quómodo potérimus subsístere ante fáciem illórum, nisi tu ádjuves nos? * Dómine Deus, ad te sunt óculi nostri, ne pereámus. T. P. Alleluja.
V. Jube, Domine, benedicere.
Bened. 9. Ab hoste malígno eripiat nos Dei Génetrix Virgo. R. Amen. (Brev. S.O.P. in festis B.M.V., Bened.)
Lectio 9. (1 Mach. 4, 8-11)
Ait Judas viris, qui secum erant: Ne timueritis multitudinem eorum, et impetum eorum ne formidetis. Mementote qualiter salvi facti sunt patres nostri in mari Rubro, cum sequeretur eos Pharao cum exercitu multo. Et nunc clamemus in cælum: et miserebitur nostri Dominus, et memor erit testamenti patrum nostrorum, et conteret exercitum istum ante faciem nostram hodie: et scient omnes gentes quia est qui redimat et liberet Israël. — Tu autem, Domine, miserere nobis. R. Deo gratias.
Responsorium 9. (1 Mach. 4, 8. 9. 10)
R. Impetum inimicórum ne timuéritis: mémores estóte, quómodo salvi facti sunt patres nostri: * Et nunc clamémus in cælum et miserébitur nostri Deus noster. T. P. Alleluja.
V. Mementóte mirabílium ejus, quæ fecit pharaóni et exercítui ejus in Mari Rubro. * Et nunc clamémus in cælum et miserébitur nostri Deus noster. T. P. Alleluja.
V. Glória Patri, et Fílio, et Spirítui Sancto. * Et nunc clamémus in cælum et miserébitur nostri Deus noster. T. P. Alleluja.
V. Dómine, exáudi oratiónem meam.
R. Et clamor meus ad te véniat. (Ps. 101, 2)
Oremus.
Oratio.
Deus, qui cónteris bella, et impugnatóres in te sperántium poténtia tuæ defensiónis expúgnas: auxiliáre fámulis tuis, implorántibus misericórdiam tuam; ut, inimicórum suórum feritáte depréssa, incessábili te gratiárum actióne laudémus. Per Dominum nostrum Jesum Christum Filium tuum, qui tecum vivit et regnat in unitate Spiritus Sancti, Deus, per omnia sæcula sæculorum. R. Amen.
V. Dómine, exáudi oratiónem meam.
R. Et clamor meus ad te véniat. (Ps. 101, 2)
V. Benedicámus Dómino.
R. Deo grátias.
V. Fidélium ánimæ per misericórdiam Dei requiéscant in pace.
R. Amen.
(Totum secreto) Pater noster, qui es in cælis, sanctificétur nomen tuum: advéniat regnum tuum: fiat volúntas tua, sicut in cælo et in terra. Panem nostrum quotidiánum da nobis hódie: et dimítte nobis débita nostra, sicut et nos dimíttimus debitóribus nostris: et ne nos indúcas in tentatiónem: sed líbera nos a malo. Amen. (Matt. 6, 9-13; Luc. 11, 3)
No comments:
Post a Comment